Facimu rota, de Giovanni Favasuli

Tant’anni arrétu ’nta chistu pajsi,

canzuni, tarantelli e risati.

Nuddhu era baruni o marchisi

ma tutti quanti facìanu scialàti.

Ora no nc’è ’llegrìzza d’intr’ê cori,

no ’nc’è armunia, no ’nc’esti caluri.

E ’u pajsi chjànu cjànu mori…

’A ggenti non è cchjù com’era ajéri!

Nescìmu fora e facìmu rota,

e sutta ’a luna di jancu pittàta,

sentimu ’i vecchj cunti di ’na vota,

facìmu festa tutta la nottata.

Nescimu fora e facìmu rota,

nsin’â quandu ’a lumera esti ddhumàta.

Arretu non tornamu annatra vota…

Esti ’nu viaggiu di sulu andata!

Portamu ’n chjàzza ’na butti di vinu

e ’na furnàta di pani di granu;

chitarri e formaggiu pecurìnu,

tamburéddhi ed organétti a mmanu.

Balla ’u massaru e ’u mastru custuréri,

cu’ mai ndeppi ’na stampa d’umbratùra;

cu’ ndavi ’a testa chjîna di penseri,

e ccu’ ’a bucca curma di sarmùra.

Balla ’u previti e Mela la Grossa,

cu’ pe’ ttant’anni non perdìu ’na missa;

cu’ ndavi ggià ’nu pedi d’intr’â fossa,

’u malandrìnu, ’u sbirru e ’u fissa.

Bàllanu ’i giuvanòtti e la mastrànza,

ccucchjàta vecchja e nova siménza;

cu’ ndavi bona o mala criànza,

’u narfabéta e ’u puzzu di scenza.

Nesci e balla puru ’a gnura Tota,

cû ll’unghj longhi e ’a facci pittàta;

duci comu racìna liparòta,

d’amuri duna a tutti ’na brocciàta!

Nescìmu fora e facìmu rota,

prima î cala fitta la nigghjàta!

’Sta vita cchjù non torna annatra vota…

Esti ’nu viaggiu di sulu andata!